December Mujhe Raas Aata Nahi

Kayi Saal Guzrey...

Kayi Saal Beetay...

Shab--O--Roz Ki Gardishon Ka Tasalsul

Dill o Jaan Mein Saanson Ki Partein Ultatey Huey

Zalz-zalon Ki Tarah Hanpta Hai...!

Cheekhtay Huey Khawab

Aankhon Kee Nazuk Ragein Chheeltey Hain

Magr Mein Hr Ek Saal Kee Goed Mein

Jagtee Subaha Ko

Bay Karaan Chahton Se Atti Zindgi Kee Dua Day Kr

Ab Tak Wohi Justaju Kr Raha Hoon

Safar Zindagi Hai

Safar Aagahi Hai

Safar Aabla Pai Kee Dastan Hai

Safar Umer Bhr Ki Sulgti Hui Khuwahishon Kaa Dhuwan Hai

Kaie Saal Guzre

Kaie Saal Beetay

Musalsal Safar K Kham O Paich Mein

Saans Leti Hui Zindagi Thk Gaie Hai

K Jazbon Ke Gilli Zameeno Mein

Boye Huey Roz O Shab Ki Hr Ekk Fasal Ab Pakk Gayie Hai

Guzarta Hua Saal B Akhri Hichkian Le Raha Hai

Merey Paish O Pass

Khaof, Daheshat, Ajjal, Barood Ki Mouj

Abadian Noch kr Apney Jabron Mein Jakri Huie Zindagi Ko

Darindon Ki Surrat

Nigalne Ki Mashqon Mein Masruf Hain

Hr Ekk Rasta, Mout Ki Rehguzar Hai

Guzarta Hua Saal jaisey B Guzra

Magr Saal K Akhri Din

Nehayat  Kathin Hain

Hr Ekk Simt Lashon K Anbaar

Zakhmi Janazon Ki Lambi Qatarein

Kahan Tk Koi Dekh Payie..?

Hawaon Mein Barood Ki Baas

Khud Aman Ki Noha Khawan Hai

Koi Charagar, Asr e hazir Ka Koi Maseeha Kahan Hai..?

Merey Milney Walo...!

Naiye Saal Ki Muskurati Subaha Gr Hath Aye.

To Milna..!

K Jatay Huey Saal Ki Saaton Mein

Ye Bujhta Hua Dil

Dharakta To Hai

Muskurata Nahi

December Mujhe Raas Aata Nahi..

Mohsin Naqvi